銀行爆煲？聯儲局鮑威爾要重啟量化寬鬆?
琴晚美國公布左最新嘅Fed Balance Sheet，見到總規模喺呢一個星期內增加左3000億美元，創2020年3月來最大單週增幅。
3000億美元係咩概念？
上年4月聯儲局開始縮表，QT差唔多一年後，資產負債表規模縮左6000億美元，即係話Fed短短一週內，就將過去一年QT嘅「努力」抹走左一半。
唔通Fed又開始搞QE？美股又返去龍市mode？
其實實際上Fed係仲做緊QT，因為我地見到Fed資產負債表上面持有嘅MBS同債券數字係減少緊，可以見到Fed係有按QT計劃行事。
今個星期資產負債表規模嘅急增，主要係因為矽谷銀行SVB事件衍生出黎嘅現象。
上星期五SVB倒塌後，過去一星期美國銀行業總共向Fed借左1650億美元應急，其中9成係用傳統緊急貸款渠道「貼現窗口」(discount window)借出，餘下一成就係用Fed新設立「銀行定期融資計畫」(Bank Term Funding Program，BTFP)借出。
另外，Fed亦係呢個星期借出左1428億美元過渡貸款(bridge loan)，主要係借俾已經倒閉嘅銀行，如無意外應該就係Silvergate，SVB，同Signature Bank，等佢地可以處理對depositor嘅一切義務並應付各項開支。
緊急貸款1650億美元加上過渡貸款1428億，造成Fed Balance Sheet一個星期內增加3000億美元。
Discount Window貸款高達1500億美元並唔係一個好嘅兆頭，因為呢個數字比2020年COVID時嘅數字仲要多兩倍，甚至比2008年金融海嘯時更多，反映呢一星期美國銀行業的確係出現好大壓力。
SVB事件係獨立事件，定只係冰山一角？我諗Fed而家都心裡有數，而家我諗聯儲局鮑威爾都頭痛緊下星期FOMC點搞好。
