美股將進入10年結構性熊市！？
月供SPY? 月供2800? 同一命運？

我地既首席投資經理陳錦鋒Angus係 Sun Channel 既節目入面提及美股黎緊10年可能會進入Secular Bear Market中文：結構性熊市，咁咪好大劑！？

 

放心，結構性熊市唔係指會熊市足十年，跌足十年先見底，但就可能係有波幅無升幅既市況，指數係個大range入面上上落落，但十年過後仍然原地踏步，即係話可能2032年既標普500指數都係係4000-5000點咁上下，同我地之前既高位差唔多。

 

美股其實唔係無試過結構性熊市，1968 – 1982年就係例子。當時標普500指數橫行足14年，1968年係100點，1982年又係100點左右，十四年就係60點至120點呢個range入面行。

 

唔好彩既係，而家既時代背景，最好既比照正正就係70年代。1970年代發生咩事？主要有兩件大事 – 1. 能源危機；2. 美國和蘇聯冷戰。

 

而家正正就係講緊能源危機同中美俄新冷戰，美股可能真係會複製返70年代既結構性熊市，所以都咪話唔擔心。

 

講講下，結構性熊市呢個字小編雖然好少聽，但又好似幾有親切感，所講既特徵咪同恒指過去10年一樣？ 玩黎玩去都係無升過！月供SPY 會唔會變成月供2800咁慘！？

 

投資邏輯已經改變，過往十年行之有效既長坐被動式ETF，係之後既十年唔會再work，要係股票上嬴錢就無得再做懶人，黎緊必須要主動式投資，需要花更多時間同精力先得。