【債券你要知】銀行定期穩賺不賠？ 債券價格可升可跌？

近排小編D姨媽姑姐，見我係做投資，都走黎問我關於銀行定期D野。

「4.2%好高喎，係咪好抵做呀？」

「3個月定6個月好呀？」

姨媽姑姐覺得有成４厘息(年化利率)，又一定唔會蝕，穩穩陣陣，基本上其他野都費事諗。

我同姨媽講：「你有百幾萬，做乜唔諗下買債券呀？美國國債Ｄ息仲高過銀行定期喎，一年期美債差唔多4.8%利息。」

姨媽答我：「唔啦！債券會蝕架！唔好諗住我咩都唔知先得架，我知今年債券跌好多呀！銀行定期唔會蝕錢，點同呀！」

姨媽呢個諗法其實唔係好岩，因為本質上銀行定期同債券都係一樣，佢地都係一張借據。

去匯豐銀行做一年定期，同買隻一年後到期既匯豐銀行債券，本質都係一樣，都係借錢俾匯豐。而風險亦都係一樣，就係違約風險(credit risk)，只要一年內匯豐唔執笠，一年後無論係定期或債券，都係會收得返晒個本同息。

咁點解姨媽會覺得定期穩賺不賠，買債券有機會輸錢呢？因為銀行定期表面上冇價格風險(price risk)，冇二手市場，唔會每日有個市價俾佢去check，唔會mark-to-market。

但表面上無蝕係咪真係無蝕到？如果你係半年前（仲係低息時期），做左個得2%既一年定期，其實呢一刻你已經蝕左，因為舊錢lock住左係一個低回報既定期，無得enjoy而家既高息。假如銀行定期有二手市場可以轉讓的話，你呢個定期肯定都係蝕緊。

債券就有二手市場，債價每日浮動，自然就有機會蝕錢啦，但同時亦代表俾個機會你係中途賣出變現，唔一定要hold到尾。如果係諗住持有到到期日的話，中間債價既升升跌跌，其實亦唔會影響最後既回報。

所以，債券會蝕，定期唔會蝕，只係一種心理上既錯覺。