【債券你要知】買債券同做銀行定期仲有乜風險？

買債券同做定期最主要既風險，就係違約風險(credit risk)，呢樣野就個個都知，但除此以外，仲有咩其他風險要注意呢?

上星期同大家介紹過，債券同銀行定期都同樣地面對住違約風險，而債券就因為債價會上上落落而有價格風險(price risk)，銀行定期表面上冇價格風險，但其實只係掩眼法，無價唔代表無蝕到。

今日想同大家介紹另一個關於債券同銀行定期既風險 – 再投資風險(reinvestment risk)。

聽落好pro咁呢？但其實只要有問過呢個問題，就有考慮過呢個風險。

「今次個定期做３個月定６個月好呢？做３個月會唔會之後無咁高息架？」

再投資風險(reinvestment risk)係指所有有到期日既投資產品，係到期時收返本金之後，再投資時既回報率可能低過一開始時既回報率。

舉個例，而家做３個月定期有4.5%，但如果3個月後市場改變，息口大跌，咁我地3個月後到期攞返舊錢，諗住再做定期時，就唔會有4.5%咁高，可能得返3%，呢一樣就係再投資風險。

咁點樣可以減少再投資風險？就係做長D。

假設而家做一年定期有4.2%，雖然表面息口低過3個月既4.5%，但一年定期可以lock左個利率係4%以上一年，at least成年唔使煩個市會唔會轉勢。對比做3個月定期，少左3次呢個煩惱，所以再投資風險相應減少。

將呢個概念再延申，就會得出債券比銀行定期有較低再投資風險，而長年期債券比短年期債券有較低再投資風險既結論。

但係越長期，亦代表當中有更大嘅違約風險同價格風險，投資者要係當中取平衡。

如果認為利率會繼續升嘅話，應該先做短啲，等待之後更高息嘅時機。

如果認為利率已經差唔多見頂，就應該做長啲，減少再投資風險。