疫情下柬埔寨的投資

上兩星期申洲國際 （2313：HK）出左一篇好特別嘅公告，話由於柬埔寨首都金邊封城14日（2021年4月15-2021年4月28），佢地係柬埔寨嘅生產將會暫停。由於4月中係柬埔寨嘅新年假期，申洲相信影響有限。

當大家都係度關注印度嘅疫情期間，其實柬埔寨嘅疫情都突然轉差。係今個月23日，仲宣佈延長關閉到5月7號。

你可能會話，封城一個月，香港同好多歐美國家都有做，封都唔止封一個月咁少啦，影響唔會好大。仲要撞正新年假，大家都要放假，最多未停工一陣？

要知道柬埔寨主要收入主要係農業、旅遊業同紡織成衣業。而對於紡織成衣業而言，香港係繼台灣同中國之後，第三大投資者。

紡織成衣業係一個一蚊一蚊咁賺嘅行業。每個月固定成本高，但係毛利率普遍得10-20%左右，如果停止生產幾日甚至幾個禮拜，影響其實好大。大家幻想一下，要生產一件衫，需要預先幾個月訂好原材料，再排好成產時間表，決定每日生產啲咩野，盡快出貨希望客戶快啲找錢。停左生產，貨錢都係要找、人工都係要出，但係錢就遲左回籠。頭寸一下就亂曬，實力低嘅生產商，隨時有問題。生意好唔好，毛利幾多唔會一時三刻令到工廠關門大吉，但係如果唔夠頭寸，啲錢轉唔到，咁就馬上出問題。

舊年疫情爆發期間，大家都用最高規格黎對待疫情，係保守的態度令到工廠可以頂得住肺炎所產生嘅影響，但係到舊年下半年，歐美訂單開始出返黎，工廠陸陸續續恢復正常，有啲仲趁其他生產國有其他問題時候，搶對家嘅訂單黎做。2021年大家都覺得工業應該可以更上一層樓嘅時候，柬埔寨突然黎個疫情失控封城，相信呢一下嘅影響將唔會比舊年疫情一開始嘅時候少。

香港唔少上市公司，都有好大比例嘅生產線係柬埔寨。就以申洲為例，柬埔寨佔申洲17% 生產力。申洲呢一個紡織界王者中嘅王者，都要馬上出公告，雖然股價好似無咩影響，但係大家見到佢地完全唔敢輕視。

大家去睇一啲紡織成衣公司嘅股價時會覺得好似都唔係吖，無咩點跌，最多都係跌少少姐。大家如果分開有柬埔寨生產線同無柬埔寨生產線嘅公司，就會發現，無柬埔寨生產線嘅公司係四月份其實個股價表現係比較好。我地係呢度就舉例兩間，包括南旋 (1982:HK) 同超盈 (2111:HK)

我地再睇下一講柬埔寨大家就會聯想到嘅金界 (3918:HK), 係四月中開始金界嘅股票節節下跌。明明旅遊賭場等生意唔會好得去邊，佢地3月出自願停業嘅公告時股價都無咩影響，反而係政府話封城兩星期時股價就跌到趴係度。睇黎投資者覺得柬埔寨嘅肺炎情況講唔會咁快搞得掂，怕封城停業不停咁打加時添。

相信柬埔寨嘅疫情將唔會係一時三刻解決到，投資者係買股票時，不妨留意下柬埔寨對你投資嘅公司有幾大影響。

馭風客戶沒有持有申洲國際、南旋、超盈及金界的股票及衍生工具。