新疆棉事件係危定係機?

新疆棉事件越演越烈，呢幾個星期相信大家嘅社交媒體都被洗版。有牌子出黎強力支持新疆棉，亦都有牌子講明唔會用新疆棉。明星藝人更加即刻跳出黎表態，解除合約、嚴厲抵制咩都有。當然仲有支持國貨買李寧、安踏，咁究竟呢單野發生緊咩事呢？係唔係中國人強大了，要將外國牌子趕出中國呢？

回溯到成件事嘅開端，來自瑞典H＆M嘅一則聲明係微博上造成瘋傳，內容大致係話「我們不與位在新疆維吾爾自治區內的任何工廠合作，也不會從此地區採購產品，並針對現階段合作的工廠是否有雇用新疆的工人」。

大家都認為事件係由 H&M 打響第一炮，但係事情又係唔係咁簡單呢？

其實新疆棉問題並唔係新鮮事，老早係舊年4月，有幾個國際非牟利機構，包括 Global Legal Action Network、 世界維吾爾代表大會等等已經開聲話新疆棉花產業存在對維吾爾族有強迫勞動、違反人權之嫌。到20年9月美國國會通過左防止強迫維吾爾勞動法，「良好棉花發展協會」（”BCI”）已經唔再出棉花許可證比新疆嘅棉花企業。

再早之前，美國有個301法案話中國新疆出現人權問題，各大品牌已經紛紛發表聲明話關注新疆維吾爾自治區（”XUAR”）人權問題，亦都紛紛話自己無係XUAR 採購。美國相關企業，為左符合美國要求，亦都紛紛要求供應商確認佢地嘅生產同 XUAR 無關，亦都講個責任交比供應商，要求佢地盡力去確認任何生產都同XUAR無任何牽連。

追索到2019 年，已經有牌子開始同新疆割席，例如係2019 年10月 Adidas 發表聲明“ In 2019, for example, on learning of allegations against several companies sourcing from Xinjiang, China, where ethnic minorities were reportedly subject to forced labor in spinning mills we explicitly required our fabric suppliers not to source any yarn from the Xinjiang region.”， 到2020 年11月 Nike 發表聲明“While Nike does not directly source cotton, or other raw materials, traceability at the raw materials level is an area of ongoing focus. We are working closely with our suppliers, industry associations, brands and other stakeholders to pilot traceability approaches and map material sources so we can have confidence the materials in our products are responsibly produced.”

其實新疆問題並唔只得棉花，所有國際大品牌都同新疆割席。年幾兩年前各大服裝品牌已經出黎發表聲明，點解係呢幾日先開始爆發呢？係唔係同H&M 有關？我地覺得好似唔係。究竟係邊個搞事真係無從稽考，呢單野點解要係呢段時間爆發仲要留待後續發展。

其實大品牌無得揀，想繼續係國際舞台上面做生意，就一定要跟BCI 企埋同一邊。BCI 擁有超過 1,800 個組織成員，其中包括 168 個品牌與零售商，好多國家都要求服裝品牌啲貨要有 BCI 認證先可以做生意。支持一個中國，得罪全世界，好似唔化算。

咁新疆棉對成個產業鏈有幾重要呢？2020 年新疆生產520萬噸棉花，佔中國生產量87%，佔全球生產量大概20%。 其實中國棉花自己都唔夠用，中國舊年係淨入口棉花，入口量大概係200萬噸。其實國際大品牌已經好醒目，唔會將生產同採購擺曬係同一個國家。如果大家有興趣，其實大部分服裝品牌都會有個表，講佢地係邊度生產同採購。就以大家都好鐘意買嘅 Lululemon 為例，19個主要原材料供應商之中，只有5個係中國公司，反而台灣有7個。至於Nike, 只有2% 嘅原材料係由中國採購，生產量只有19% 來自於中國。

照牌面咁睇，中國對所有大牌子黎講仲係有影響力，十四億人嘅市場始終係一個好龐大既市場。大中華區佔 Nike 大概20% 營業額，至於H&M, 中國對集團嘅銷售貢獻只有5%左右。俾中國消費者杯葛，短期內好似真係會無左啲生意，但睇返過往呢類型杯葛行動一般都唔會維持好耐，減少少價，做多少少Marketing已經可以解決大部分問題。

至於生產方面，的確中國仍然係世界工廠，大品牌唔可以係短時間內完全撤出中國。但係中國其實已經唔係大品牌嘅主要生產基地。Nike只係剩返19%嘅貨係中國生產，H&M都差唔多，只有大約20%嘅供應商係中國。其實各大牌子已經慢慢咁搬佢地嘅生產線去唔同國家，就係怕某一個國家突然出問題，影響到佢地嘅供應。   

我地睇落好似中國無論係銷售或者生產都唔會對啲品牌造成重大嘅影響，而睇返各大牌子嘅股價，包括Nike (NKE)、德國上市既Adidas(ADS)、香港上市既申州國際(2313)等等都只係跌左一兩日就無再跌，馭風都有把握時機襯個兩日低位幫客戶撈左少少NKE，希望幫大家贏返啲！

馭風客戶持有Nike股票及衍生工具，並可能隨時買入或沽出。