【債券你要知】買債收息 vs 買樓收租

如果有舊閒錢想追求穩定現金流，好多人都係諗買樓收租，但又有無考慮過買債券收息？今日就同大家比較一係當中嘅優勢同劣勢。

先講潛在回報，買樓比買債券有一個好大優勢，就係買樓有資本增值空間，加上買樓基本上一定會做槓桿，即係按揭，所以更能倍大回報。而債券基本上係無乜升值空間，除非係長年期債券或者一啲違約風險好高嘅債券，一般黎講債價係比較少出現升值10%以上嘅情況，但當然債券都可以做槓桿去倍大回報。

而樓嘅另一明顯優勢，就係好難total loss，樓價就算跌都係跌幾成，亦都可以住入去，有功能性，但債券如果遇上違約事件，係可以輸到變$0變廢紙。咁當然啦，買樓唔會total loss嘅前題係full pay，如果做按揭的話，輸突變負資產都仲得。

樓同債理論上都做到穩定現金流，但同時亦都面對違約風險。買樓收租都有違約風險？係，就係會遇到租霸，而遇到租霸嘅機會率，應該比債券違約嘅機率高，所以現金流確定性黎講，樓係唔及債券。

另外，買賣物業亦涉及高昂交易費用，買樓需要俾印花稅、律師費、裝修、買傢俬、買電器等等，動輒可以去到本金（即係首期，唔係樓價），呢啲雜費加埋可以係本金嘅十幾甚至更高百分比。假設買一層600萬樓，只需要一成首期即係60萬，雜費加埋隨時仲多過首期，而買債券嘅交易費用一般黎講係唔會多過1%。

買樓收租另一問題就係管理難度較高，投資物業作出租需要處理好多煩複事，例如租客有要求時都要去處理，例如壞冷氣又要業主去整或買一個新等等，較為煩瑣麻煩，管理上無債券咁容易。

香港人習慣咗買樓，好大原因係過去十幾廿年樓價係長升長有，但之後仲係咪咁呢？而家全球都面對緊高通脹問題，QE年代已經過去，係呢個環境下，港樓升值空間仲有幾多呢？

以而家嘅租金回報黎計，買美國國債嘅yield應該仲高，如果你係追求穩定現金流嘅投資者，債券都可能係一個合適選擇。